Скопје и САД ја зајакнуваат соработката: Средба на Ѓорѓиевски со в.д. амбасадорката Никол Варнс
Градоначалникот на Град Скопје, Орце Ѓорѓиевски, денеска оствари средба со вршителката на должноста шеф на мисијата во Амбасадата на Соединетите Американски Држави, Никол Варнс.
Како што информира Ѓорѓиевски преку објава на социјалните мрежи, на средбата било разговарано за продолжување и продлабочување на соработката меѓу Град Скопје и САД, со посебен акцент на клучни општествени прашања, меѓу кои борбата против корупцијата, унапредувањето на демократските процеси и зголемувањето на учеството на граѓаните во носењето одлуки на локално ниво.
Градоначалникот ги презентирал и проектите на кои, како што наведува, интензивно работи Град Скопје во изминатите три месеци. Меѓу приоритетите се подобрувањето на сообраќајната инфраструктура, унапредувањето на јавната хигиена, создавањето нови зелени површини, како и поголемото вклучување на младите во општествените процеси.
Во разговорите биле отворени и можности за продлабочување на соработката меѓу збратимените градови Темпи и Питсбург, преку организирање програми за студиски престој на средношколци и уметници. Според Ѓорѓиевски, ваквите размени претставуваат можност за културна соработка и меѓусебно запознавање меѓу младите од збратимените градови.
На средбата била потврдена и долгогодишната поддршка од САД како стратешки партнер, како и подготвеноста за реализација на заеднички проекти насочени кон подобрување на квалитетот на живот на граѓаните на Скопје.
Ѓорѓиевски порача дека Град Скопје останува посветен на градење партнерства што носат конкретни резултати и придонесуваат за поефикасно и одговорно урбано управување.
