„Сите ние сме Драгиша Миленковиќ“ – со оваа порака Србите пак протестираа на Косово
Србите на Косово и денеска протестираа затоа што вчера косовската полиција уапси Србин за наводни воени злосторства. Тие се собраа пред полициската станица во Грачаница на протест поради вчерашното апсење на Драгиша Миленковиќ.
Насобраните со себе носеа транспаренти на кои пишува „Сите ние сме Драгиша Миленковиќ“, „Стоп за криминализацијата на Србите“, „Ослободете го нашиот невин народ“, „Правда за српскиот народ“.
На собирот се обратија директорот на Центарот за култура Грачаница, Живојин Ракочевиќ и лекарката Наташа Прентиќ. Нов протест е закажан за утре напладне.
Вчера додека траеше протестот, Албанец со возило влета во толпата и повреди еден маж.
Македонскиот министер за надворешни работи, Бујар Османи вели дека загрижувачки се вестите кои доаѓаат од Косово. Постои и вознемиреност, затоа што големи се можностите за посериозна ескалација со човечки последици. Српскиот претседател Александар Вучиќ најави дека денеска ќе отпатува за Брисел, но на средба со европскиот политичар Жозеп Борел, а не и со косовскиот премиер, Албин Курти.
Србија бара Косово да ги ослободи уапсените Срби, а Косово пак бара од Србија да ги пушти тројцата косовски полицајци кои неодамна беа уапсени во централна Србија.
фото социјални мрежи
