Сиљановска-Давкова: Техничката влада е неуставна, потребен е дијалог за нејзино укинување

Претседателката Гордана Сиљановска-Давкова денеска изјави дека измените на Законот за Владата кои се однесуваат на техничката влада, според неа, биле и остануваат неуставни. Таа ја поддржува иницијативата за нејзино укинување од следните избори, но нагласува дека процесот треба да се одвива низ политички дијалог.

Според неа, техничката влада во македонскиот контекст отстапува од меѓународната пракса, каде ваквите влади најчесто се составени од експерти и имаат за цел да обезбедат фер и демократски избори. Во домашниот случај, посочи, станува збор за политичка, а не вистински техничка влада.

Сиљановска-Давкова најави дека ќе го потпише указот за законот, но смета дека е неопходна јавна дебата за неговите предности и слабости, исто како и при неговото донесување. Таа додаде дека прашањето за уставноста може да биде разгледано и од Уставен суд.