Сиљановска-Давкова на вежбата „Брз одговор 2025“: Нашето членство во НАТО не е само политичка формалност, туку стратегиска определба
Претседателката и врховна командантка на македонската армија, Гордана Сиљановска-Давкова на армискиот полигон Криволак присуствуваше и се обрати на воената вежба „Брз одговор 2025“, на која учествуваат повеќе од 2200 војници од 9 држави.
Испишувајќи уште една успешна страница во историјата на македонската армија, со вежбата, истакна таа – државата ја потврди својата определба да биде со земјите коишто го штитат мирот како врвен цивилизациски идеал. Додаде дека оваа вежба не е само демонстрација на воена моќ, туку манифест на солидарност, симбол на единството и потсетник дека само заедно можеме да им се спротивставиме на заканите коишто ги загрозуваат мирот и стабилноста.
Сиљановска-Давкова ја истакна посветеноста и стручноста на македонската армија, за која рече дека во време на глобални безбедносни закани е подготвена да дејствува рамо до рамо со сојузниците, во одбрана на слободата, достоинството и човековите права. Таа нагласи дека нашето членство во НАТО не е само политичка формалност, туку стратегиска определба.
Претседателката потенцираше дека со учеството на стотици македонски војници во најголемата воена вежба на овој полигон, државата уште еднаш потврди дека и покрај сите предизвици, стои цврсто на страната на мирот, безбедноста и заедништвото.
Во кусиот разговор со војниците, таа изрази задоволство од нивната професионалност демонстрирана на теренот и им се заблагодари на сојузниците за поддршката, помошта и за споделеното знаење.
Во продолжение е интегралниот текст од обраќањето на претседателката Гордана Сиљановска-Давкова.
Мирот нема алтернатива. Тој е избор на храбрите, завет на посветените и обврска на секој што ја носи униформата со чест.
Денеска, овде, на полигонот „Криволак“, не испишуваме само уште една успешна страница во историјата на нашата армија, туку ја потврдуваме определбата да бидеме дел од оние што го штитат мирот како врвен цивилизациски идеал.
Најголемата воена вежба „Брз одговор 2025“ обедини над 2.200 војници од девет држави. Оваа вежба не е само демонстрација на воена моќ, туку манифест на солидарност, симбол на единство, потсетник дека само заедно можеме да им се спротивставиме на заканите коишто ги загрозуваат мирот и стабилноста.
Во време на глобални безбедносни закани, кога светот е растргнат меѓу војните и надежта, нашата армија демонстрира интероперабилност, професионалност и подготвеност да дејствува рамо до рамо со сојузниците, во одбрана на слободата, достоинството и човековите права.
Нашето членство во НАТО не е само политичка формалност, туку стратегиска определба, израз на нашата волја и решеност да бидеме дел од колективниот одговор на современите предизвици и дилеми.
Salus populi suprema lex esto – безбедноста на народот е врховен закон за нас.
Почитувани војници и старешини,
Македонската армија, иако бројно мала, е голема по дух, по знаење, по љубов кон татковината. Вашата подготвеност, вашата извонредна посветеност и вашата стручност се одраз на доблеста на една модерна армија. Вашата сила е силата на знамето коешто гордо се виори над нас – симбол на слободата, на достоинството и на државата којашто гордо чекори во Алијансата.
Преку храброто изведување на копнени борбени дејства, вие ги манифестирате интероперабилноста, подготвеноста и способноста да се одврати секоја закана, заедно со НАТО-сојузниците и партнерите. Овој подвиг е одлична можност за подготовка на Лесната пешадиска борбена група за претстојното оценување на борбената подготвеност во 2026 година.
