Шумата се уште гори: Пожар беснее во село Лукаре, на границата помеѓу Скопско и Кумановско

Пожар кој започна во понеделникот, на 22.09.2025 година, во Шумско стопанската единица Брест, во близина на скопското село Малино Маало, се прошири на непристапен терен во Кумановско. Огнот е сѐ уште активен, а силните ветрови го отежнуваат гаснењето.

Според извештајот на ЈП „Национални шуми“, пожарот бил пријавен од месното население, по што веднаш на терен излегле пет вработени од подружницата „Караџица“ од Скопје. Тие, заедно со локалните жители, го гаснеле огнот со пумпа, возило и трактор со цистерна. Во попладневните часови, во акцијата се вклучиле и воздухоплови.

Сепак, поради ветрот, пожарот денеска се префрлил од Брест кон селото Лукаре, во Шумско стопанската единица Копиљача. На терен се распоредени екипи од „Национални шуми“ од Скопје и Куманово, со четири и три вработени, соодветно, заедно со возила и пумпи. Во гаснењето учествуваат и припадници на пограничната полиција од Танушевци и противпожарната единица.

Огнот беснее на тешко достапен терен, што дополнително го отежнува напорот на екипите. Јавноста со загриженост ја следи ситуацијата, надевајќи се дека пожарот наскоро ќе биде ставен под контрола.