Штрајкот на Контролорите на летање е откажан, Судот изрече времена забрана
Авиосообраќајот во државава нема да биде прекинат в понеделник. Струковиот Синдикат на Контролори на Летање на Македонија (ССКЛМ) соопшти дека ќе ја почитува одлуката на Граѓанскиот суд, кој изрече времена мерка за забрана на штрајкот што беше најавен за од 10 до 15 часот.
Претседателот на ССКЛ, Александар Тасевски, на денешната прес-конференција изјави дека иако мора да го почитуваат решението, синдикатот нема да се откаже од своите барања и ќе го стави штрајкот во мирување. Тој најави дека ќе ја обжалат одлуката и ќе поднесат претставка до Републичкиот судски совет против судијката која го водела предметот, бидејќи, како што тврди, не им била дадена можност да ја изложат својата одбрана.
„Бевме спремни денеска да се појавиме на рочиште, но испадна дека е откажано и воопшто не ни беше дадена прилика да ја изложиме нашата одбрана и сето она што е наведено невистинито во нивното тужбено барање да го оспориме на Суд“, рече Тасевски.
Одлуката на судот следуваше по барање на раководството на М-НАВ, кое оцени дека најавениот штрајк е спротивен на законот бидејќи не била спроведена постапка за мирно решавање на спорот и дека барањата не произлегуваат од конкретни работни односи.
Тасевски, од своја страна, тврди дека постапката за помирување е одамна завршена и дека клучниот проблем е што новата менаџерска структура на М-НАВ одбива да ја почитува Спогодбата потпишана во 2023 година. Меѓу главните барања на синдикатот се ангажирање на консултантска фирма за функционална анализа на претпријатието, вработување на стручни кадри наместо партиски, како и подобри услови за работа.
„Едно од барањата е подобрување на услови за работа, да се реши проблемот со водата, со денови немаме вода на работа, вработените мора да одат или во Аеродромот ТАВ или во локалните кафеани во Петровец за да извршиме нужда“, рече Тасевски.
