Што вели Вучиќ за потерницата за Путин?
Многу работи се комплицирани, смета српскиот претседател Александар Вучиќ за потерницата која Хашкиот суд вчера ја распиша за рускиот претседател Владимир Путин за извршени воени злосторства во Украина.
„Светот си оди, само ние да не одиме со него. Сега гледам дека многу работи се комплицираат, треба да избегнеме многу од тоа“, рече Вучиќ.
Меѓународниот кривичен суд во Хаг вчера информираше дека издал налог за апсење на претседателот на Русија, Владимир Путин, под обвинение за воени злосторства поради неговата можна вмешаност во киднапирањето деца од Украина.
Адвокатот Тома Фила вели дека Путин може да заврши како екс српскиот претседател Слободан Милошевиќ.
Меѓународниот кривичен суд (МКС) издаде и налог за апсење на неговата комесарка за правата на децата, Марија Алексеевна Лвова-Белова, под истите обвиненија за нелегална депортација на украински деца.
Лвова-Белова, која во руските медиуми ја нарекуваат „Мајка Русија“ на таа позиција беше назначена од Путин во 2021 година. Таа неодамна се појави на насловните страници, кога сподели информации на нејзиниот канал на Телеграм дека помага да се поврзат украинските деца со руските родители кои се надеваат дека ќе ги посвојат.
Во пролетта 2022 година, Лавов-Белова посвои украински тинејџер од Мариупол. „Кога ги донесовме во Русија да се опорават малку, почна приказната дека зборувале негативно за Путин, кажувале секакви грди работи, ја пееле украинската химна и сето тоа. Така што, постои таква негативност , можеби на почетокот, но потоа се претвора во љубов кон Русија“, изјави Лвова-Белова, пренесува BBC.
Си-Ен-Ен во февруари објави дека Лвова-Белова постојано ги посетувала териториите окупирани од Русија во Украина и се погрижила украинските деца да бидат депортирани во Русија, каде потоа руски семејства ги посвојувале.
Србија е една од ретките земји која не воведе санкции за Русија.
