ШТО СЕ СЛУЧУВА СО „ЦРНОТО ЗЛАТО“: Цените на нафтата паднаа за околу 2 отсто минатата недела
На глобалните пазари, цените на нафтата паднаа за околу 2 отсто минатата недела, бидејќи трговците се скептични за намалувањето на производството на ОПЕК и поради слабите економии, можен е дополнителен пад на побарувачката.
На лондонскиот пазар цената на барелот минатата недела падна за 2,1 отсто, на 78,88 долари, додека на американскиот пазар цената на барелот се намали за 1,9 отсто, на 74,07 долари.
Организацијата на земји извознички на нафта (ОПЕК) и нејзините сојузници одлучија да го намалат производството во првиот квартал од следната година за приближно 700.000 барели дневно.
ОПЕК+ произведува повеќе од 40 отсто од светската нафта и веќе долго време го намалува производството за да ги поддржи цените, кои паднаа од речиси 100 на околу 80 долари за барел поради слабеењето на економиите, а со тоа и побарувачката за нафта.
Првично оваа одлука на ОПЕК го поддржа поскапувањето на нафтата, но набрзо тие паднаа бидејќи трговците се скептични, со оглед дека производителите доброволно ќе го намалат производството и нема да има контроли.
Аналитичарите, пак, очекуваа дека намалувањето на производството ќе биде поголемо и дека ќе инсистираат на почитување на договорените квоти.
Одлуката „нема да ја смири конфузијата на пазарот на нафта, за која ќе бидат потребни недели и месеци за да се дознае како стојат работите, а под услов извештаите што самите производители ќе ги состават да бидат навистина веродостојни“, објаснува аналитичарот на PVM, Џон Еванс.
Тоа ја ослабува светската економија
Под притисок се и цените на нафтата поради натамошното слабеење на најголемите светски економии.
Податоците од глобалната индустрија, исто така, покажаа слабост во ноември поради намалената побарувачка. Индустриската активност во еврозоната повторно се намали, објави S&P Global, а ниту кинеската економија, најголемиот увозник на нафта во светот, не е во најдобра форма.
Цените во моментов се поддржани само од верувањето на трговците дека централните банки на западните земји го завршија циклусот на зголемување на каматните стапки, со оглед на тоа што инфлацијата се намалува.
Но, економиите најверојатно ќе стагнираат или ослабуваат во наредните месеци, а ќе поминат месеци пред централните банки да почнат да ги намалуваат каматните стапки и на тој начин да го поддржат закрепнувањето на економиите.
По минатонеделниот пад, цената на барелот на лондонскиот пазар е во минус во однос на почетокот на годината за повеќе од 8 отсто, а на американскиот пазар за повеќе од 7,5 отсто.
