Што го чека Навални во „Поларен волк“: Тешки услови во затвор, прескапа храна од киосци и специјални прошетки
По 19 дена без информации за рускиот опозициски лидер Алексеј Навални, откриено е дека тој е префрлен во еден од најбруталните затвори во Сибир.
Тој преку социјалните мрежи на сите им порача дека е „новиот Дедо Мраз“, а објавата е објавена на неговиот официјален профил на Инстаграм, која се претпоставува дека ја направиле членови на неговиот тим.
„Имам капа од овча кожа, капа со уши, наскоро ќе ми дадат валенка, а за 20 дена ќе пуштам брада“.
Тој исто така се пошегува дека не вели „хо хо хо“, туку „ох ох“ кога ќе погледне низ прозорецот каде што може да види ноќ, па вечер, па ноќ.
Причината е што тој е во поларниот круг каде во овој период од годината речиси и нема дневна светлина, но рече дека никој не треба да се грижи за него и дека е добро.
На исчезнувањето на Навални му претходело апсење на тројца адвокати кои го застапувале во различни периоди: Игор Сергунин, Вадим Кобзев и Алексеј Липсер. Во октомври тие беа приведени под обвинение за учество во „екстремистичка организација“.
Затворот во кој е сместен се вика Казнената колонија бр.3 „Поларен волк“. Велат дека оттаму е речиси невозможно да се избега бидејќи од едната страна има стотици километри тундра, а од другата поларните Уралски планини.
Тежок е и протокот на информации, имајќи предвид дека телекомуникациите не функционираат баш најдобро.
Навални бил во фаза на превезување од една во друга казнена колонија и, како што пишува опозицискиот портал Медуза, нормално е дека во тој период нема комуникација со затворениците.
Дестинацијата на трансферот наводно се чува во тајност не само од адвокатите и роднините, туку и од самиот осуденик, кој може да дознае за трансферот само неколку часа пред поаѓање.
