Шкендија го декласира Шкупи, „Шверцери“ си заминаа од трибините
Фудбалерите на Шкупи доживеаја тежок пораз на стартот од новата сезона во Првата македонска фудбалска лига, откако беа поразени од Шкендија со убедливи 5:1 во Тетово.
Гостувањето беше проследено и од најверните навивачи – „Шверцери“, кои пристигнаа во Тетово, но не останаа до крајот на натпреварот. Како што е веќе познато, навивачката група од Чаир повторно беше пуштена на трибините со задоцнување, а во второто полувреме колективно го напуштија стадионот.
На трибината оставија транспарент со остро предупредување: „Ви верувавме на зборовите, ни продадовте лаги. Шкупи не е место за измамници“.
Навивачите ја изразија својата фрустрација и разочараност од раководството на клубот, обвинувајќи за лажни ветувања и погрешна насока во која се движи клубот.
Овој потег на „Шверцери“ дополнително ја засени играта на теренот, а поразот од 5:1 уште повеќе го продлабочи незадоволството меѓу фановите.
Видео од протестниот гест веќе се споделува на социјалните мрежи, каде навивачите најавуваат „будна есен“.
