Шефот на Пентагон: Иницијативата на Трамп не е предавство на Украина
Иницијативата на американскиот претседател Доналд Трамп, кој се договори со рускиот претседател Владимир Путин „веднаш“ да почнат преговори за Украина, не е „предавство“ на таа земја, изјави во Брисел американскиот министер за одбрана Пит Хегсет.
„Нема предавство. Има разбирање дека целиот свет и САД се посветени на мир, мир со преговори“, изјави Хегсет пред новинарите пред состанокот на министрите за одбрана на НАТО, пренесе агенцијата Франс прес.
Тој изјави дека американскиот обид да преговара меѓу Украина и Русија „секако не е предавство“ на украинските војници кои се борат против руската инвазија во последните три години, пренесува Би-Би-Си.
Хегсет нагласи дека САД покажале неверојатна посветеност на НАТО и дека ниту една земја не се посветила на Украина повеќе од САД.
Тој додаде дека САД инвестирале повеќе од 300 милијарди долари за стабилизирање на линиите на фронтот по почетокот на руската агресија и дека светот е „среќен“ што го има претседателот Доналд Трамп и дека сега само тој „може да собере сили за да донесе мир“.
Трамп најави средба со рускиот претседател Путин и предвиде прекин на огнот во Украина „во не така далечна иднина“.
Американскиот претседател го информирал украинскиот претседател Володимир Зеленски за разговорот со Путин.
Путин му рекол на Трамп дека сака да најде „долгорочно решение“ за украинскиот конфликт преку „мировни разговори“, соопшти Кремљ.
Би-Би-Си потсетува дека Хегсет вчера изјавил дека би било нереално да се мисли дека Украина може да се врати на државните граници пред 2014 година и ги намали изгледите на Киев за влез во НАТО.
