Секој доктор, од породувањето до излегувањето од таа болница, е одговорен што останав без органи, рече Веапоска
Денеска во Основниот суд во Струга продолжи судскиот процес за родилката од Дебар, Јелдаз Веапоска, која при породувањето во 2020 остана без бубрег, матка и јајник.
На распит беа судските вештаци од Институтот за судска медицина, кои одговарајќи на вкрстеното испрашување на обвинителството и одбраната за начинот на кој била оштетена бубрежната артерија при изведувањето на царскиот рез, потенцираа дека станува збор за оштетување, а не за пресекување, а причината за оштетувањето е непозната.
Според нив, во наодот стои дека има оштетување без детален опис и не можат да се изјаснат како настанало.
„Во описот не е спомената аневризма, која може да се утврди со голо око. Во нашето мислење не се осврнуваме како постапка на несовесност, туку на периодот од следните четири дена, кога не е поставена дијагноза и не е утврден изворот на крвавењето. Ние наведуваме дека постојат причинско-последична врска во начинот на лекувањето и пропуст да се преземат мерки за да се утврди причината за крвавењето. Има дијагностички процедури, можело со ехо ултразвук на стомакот да се види од каде е крвавењето“, рекоа вештаците.
Веапоска и ги потсети дека покрај бубрегот, неа и се извадени уште два органа, односно и матката за која воопшто не се зборувало зошто е извадена и зошто не може да има деца, како и за тоа како е оштетен јајникот.
Таа додаде дека за нејзината состојба виновен е целиот персонал кој бил ангажиран за нејзиното породување.
„Секој доктор, од породувањето до излегувањето од таа болница, е одговорен“, изјави Веапоска.
Адвокатот на Веапоска, Сашо Јанев, кажа дека и покрај тоа што вината ја утврдува судот, според содржината на вештачењето можел да се претпостави исходот на оваа постапка.
Според него, во вештачењето стоело дека товарот на несовесното лекување паѓа на сите учесници.
„Во самото вештачење се зборува за гинеколозите, анестезиолозите, за сите учесници. Имињата и презимињата на сите нив се во самиот обвинителен акт. Што се однесува до мене, би ги ставил сите од Струшката болница на обвинителна клупа. Да влезете сосема здрав и прав и да излезете без три органи, треба сите кои придонеле да одговараат за тоа“, додаде Јанев.
