„СЕГА ЛИ ЌЕ НИ БАРААТ ПЕРСОНАЛЕЦ ЗА 2020 ГОДИНА, КОГА ВЕЌЕ ГИ ПОТРОШИВМЕ ПАРИТЕ“ Протест на кумановци кои работеа во Ирак и во Авганистан
Граѓаните кои со години работеа во американски фирми во Ирак и во Авганистан денеска мирно протестираа на малиот градски плоштад во Куманово и побараа Управата за јавни приходи (УЈП) да ги ревидира известувањата за плаќање персонален данок на доход за периодот од 2020 година наваму. Граѓаните укажаа дека протестот не е политички, ниту партиски мотивиран, туку исклучиво граѓански протест, преку кој најавуваат дека ќе ги користат правните механизми за решавање на проблемот што им го наметнува УЈП.
Печалбарите кои со години работеа за американски компании велат дека УЈП им доставила известување за плаќање персонален данок на доход од јуни 2020 година, период кога голем дел од нив воопшто и не биле во државата, поради пандемијата. За нив е нејасно зошто ретроактивно се спроведува наплатата. Тие укажуваат дека не се против даноци, дека спечалените пари се вложени во Куманово и дека се плаќани даноци по разни основи, како и други давачки, такси и придонеси.
Во изјавата за медиумите посочија дека ако законот важел тогаш, требало тогаш да добијат известување и да си платат данок.
– Проблем е што ние сме биле во тие земји повеќе од 183 дена годишно. Побаравме од МВР потврда дека сме биле излезени и надвор од државата, не ни даваат, иако имаме докази, печати и визи. Има луѓе што не стапнале во Македонија по 9 месеци, конкретно во пандемијата. Не сме против даноци, но не може УЈП да нè известува во период кога американски компании слават Божиќ и во период кога ние славиме празници. Станува збор за поголема група луѓе од 3.000 до 4.000 луѓе. Сигурни сме дека американските компании, за кои работевме, кои се исклучително респектабилни, кои остваруваат огромни приходи, сигурни сме дека си платиле данок во матичната земја, овде станува збор за двојно оданочување. Нè притискаат за 10 дена да подготвиме сè, период кој заради празниците не можеме да го испочитуваме – изјавија Зоран Наковски и Жикица Миланов од Куманово.
Печалбарите кажаа дека доколку знаеле за законот и за обврската ќе си одвоиле пари да ги платат данокот. Тие укажуваат дека голем дел од нивните колеги ги потрошиле спечалените пари. За нив е нејасно зошто ретроактивно се наплатува и зошто МВР не ја издава потврдата кому секому му следува, покажувајќи македонски пасоши со излезени печати. Кажаа дека ќе побараат известувања од компаниите, ќе ги преведат и ќе достават до УЈП, но дека им е потребно време.
– Парите што ги спечаливме ги вложивме тука во Македонија, во Куманово, изградивме куќи, купивме станови, ги школувавме децата, почнавме бизниси. Тие пари се слеваа на нашите сметки, со нив работеа македонските банки, не се „црни“ пари, спечалени се со мака и потрошени како што треба, сè ни е платено – кажаа кумановци.
Тие изјавија дека имале работни визи кои ги спонзорирале компаниите за кои тие работеле.
Кумановци побараа од Министерството за финансии и од УЈП да ја стопираат оваа акција, да им остави време компаниите да издадат потврди, за да може да ги достават, а од МВР да им издаде потврди дека биле надвор од земјава 183 дена.
– Не бараме амнестија, не бегаме од обврски, бараме дијалог – порачаа кумановци.
Инаку, во базите на САД во Авганистан и во Ирак во изминатите 24 години за различни компании работеа од 15.000 до 20.000 кумановци. Даночни решенија примиле околу 4.000 лица со суми за плаќањее од 200 евра нагоре.
.
