„СЕ ЗАГРОЗУВА СУВЕРЕНИТЕТОТ НА ЗЕМЈАТА“: Здружението на инженери бара замрзнување на партнерството за Чебрен

Поради правни, економски и стручно-научни недостатоци од Здружението на инженери на Македонија поднесена е претставка до надлежните институции за одлуката за концесија за хидроцентралата Чебрен. 

Од Здружението појаснуваат дека сакаат да го замрзнат процесот за потпишување на договор за партнерство додека се истражат нивните сомневања. 

– Претставката ја поднесовме поради сомневање дека со општите акти на Владата во постапката при подготовката и реализацијата на јавниот повик за доделување концесија за користење вода за производство на електрична енергија со изградба на хидроелектрични централи на Црна Река се направени бројни суштински, правни, економски и стручно-научни недостатоци со кои се загрозуваат суверенитетот, територијалната целина и основите на економските односи определени со Уставот, како и уредувањето на територијата за потребите на одбраната предвидени со Планот за одбрана на Републиката согласно одредбите од Законот за одбрана – се вели во соопштението. 

Објаснуваат дека очекуваат надлежните органи да постапат по претставката и да го замрзнат процесот за потпишување на договор за јавно-приватно партнерство сѐ додека не се истражат, потврдат или отфрлат нивните сомневања.

– Преставката е испратена до Уставниот суд, Државното правобранителство, Државната комисија за спречување на корупцијата, Државниот завод за ревизија, Јавното обвнителство и Бирото за јавни набавки – се наведува во нивото соопштение

Од Здружението на инженери сметаат дека проектот за изградба на хидроцентралата Чебрен по пат на јавно – приватно партнерство е штетен и со него се нарушува електроенергетската независност на земјава и се дава на управување воден ресурс кој е веројатно најзначаен во овој век.