Се воведуваат нови правила за поправка на ТВ, машини за перење, правосмукалки, мобилни телефони…
Европската комисија објави законски предлог со кој би требало да се олесни поправката на производите доколку е поисплатливо од купувањето нов производ.
„Сакаме да им помогнеме на потрошувачите да ги поправат производите доколку сакаат и да донесат поинформирани одлуки и да ги охрабриме производителите да овозможат поправка наместо бескрајно да купуваат нови производи кои нам, потрошувачите, не ни требаат“, рече заменик-претседателката на Комисијата Вера Јоурова.
Предлогот за директива за заеднички правила, која промовира поправка на производи наместо купување нови, има за цел да обезбеди заштеди за потрошувачите и да го намали количеството отпад, со што ќе придонесе за исполнување на целите на Зелениот план.
Од Комисијата посочуваат дека овој предлог треба да придонесе за напуштање на моделот „земи-направи-крши-фрлај“, кој се воспостави во последните децении бидејќи потрошувачите немаа доволно стимулации да ги поправат расипаните производи и претпочитаа да купуваат нови.
Предлогот треба да обезбеди поправка на повеќе производи пред истекот на гаранцијата и полесна и поевтина поправка на производите што може да се поправат (како правосмукалки, а наскоро и таблети и паметни телефони) по завршувањето на гаранцијата и оние што се расипуваат за време на нормална употреба.
Што се менува
„Овој предлог комплетира низа мерки за правото на поправка. Првиот чекор е да се дизајнираат производите за да можат да се поправат, а потоа да им се обезбедат на потрошувачите информации за одржливите производи достапни на пазарот“, рече комесарот за правда Дидие Рејндерс.
По истекот на гаранцијата, на потрошувачите им е тешко да се одлучат за поправка бидејќи е тешко да се најде соодветна услуга по прифатлива цена.
Според сегашните правила, потрошувачите можат да побараат од продавачот бесплатна поправка или замена на неисправен производ во гарантниот рок од две години. Според новиот предлог, во случај кога поправката е поевтина, продавачот мора да обезбеди бесплатна поправка наместо замена.
По истекот на гарантниот период, производителите на производи што може да се поправат, како што се телевизори, машини за миење садови, машини за перење, сушење, правосмукалки, ќе мора да обезбедат поправка на производот 5 до 10 години по купувањето, во зависност од видот на производот, освен во случаите каде поправката е невозможна.
Потрошувачите ќе имаат право да побараат од сервисот за поправка европски формулар за поправка, кој ќе ги содржи условите и цените за поправки и кој ќе им овозможи лесно да ги споредуваат понудите за поправка. Предлогот мора да биде усвоен од Советот на ЕУ и Европскиот парламент.
