СЕ ТОВАРИ ЗА УБИСТВО НА ЦИВИЛИ: Косовски Србин е осуден на 13 години затвор
Косовски Србин е осуден на 13 години затвор за воени злосторства во 1999 година.
Основниот суд на Приштина денеска го осуди Душко Арсиќ на 13 години затвор за воени злосторства, кои, според обвинението, ги извршил во селото Бутовац за време на војната во Косово во февруари 1999 година, јави дописникот на МИА од Приштина. Судскиот совет наведе дека од јануари до јуни 1999 година, Арсиќ, кој живеел во селото Матичан во близина на Бутовац, учествувал во насилното протерување и иселување на граѓаните на Приштина и околината, како и дека запрел малолетник и заедно со другите припадници на паравоените единици го малтретирал.
Групата во која членувал Арсиќ во февруари истата година, првично ранила и убила неколку жртви, меѓу кои и лицето Брахим Шала, кој бил убиен со автоматска пушка, а потоа му наредиле на тогаш 15-годишен Артан Красниќи, да го носи на грб неговото тело.
Арсиќ е обвинет дека, како дел од српската полиција и паравоените групи, „физички и психички го малтретирал, го удирал по грбот, го пцуел и го третирал како терорист“ малолетниот Красниќи, кој денеска беше присутен во судницата за време на изрекувањето на пресудата.
Адвокатот на Арсиќ, Небојша Влајиќ изјави дека не ја очекувал оваа пресуда, но и не е изненаден. Тој најави жалба.
„Мислам дека по денешното објавување на пресудата и најдобронамерните набљудувачи ги загубија илузиите за демократскиот капацитет на косовското судство. Косовското правосудство едноставно ја убедува јавноста со секоја наредна пресуда дека не е во состојба да спроведе правична постапка“, рече тој.
Арсиќ е уапсен на граничниот премин Јариње, меѓу Косово и Србија, во декември 2021 година и од тогаш е во притвор во Подујево. Повеќе Срби изминативе години беа апсени за извршени воени злосторства за време на војната во Косово. Белград постојано обвинува за прогон на Србите и терор со цел етничко чистење.
