„СЕ РАЗБУДИВ НА ПАРКИНГ, РЕЧИСИ ЗАДУШЕНА“: Сведоштвото на Сара за пеколот во „Пулс“ ги отвори старите рани
Дваесетгодишната Сара Велинова, која пред само една година била дел од ведрото мнозинство на концертот на групата „ДНК“, денеска застана пред судот за да го опише моментот кога забавата се претворила во смртоносна стапица.
Нејзиното сведочење е клучен дел од мозаикот со кој Обвинителството се обидува да докаже дека дискотеката „Пулс“ била небезбедна по повеќе основи.
Сара, со видлива вознемиреност, пред судијката Дијана Груевска-Илиевска раскажа како ентериерот на дискотеката бил фатален за присутните.
Таа потврди дека по реновирањето, плафонот над бината бил значително спуштен, точно над местото каде што биле поставени огнените прскалки (пиротехниката).
„Се онесвестив додека траеше хаосот. Се разбудив надвор, на паркингот, речиси целосно задушена“, изјави таа.
На прашањето дали некој од вработените или обезбедувањето помогнал во евакуацијата, Сара беше децидна – додека барала спас кон единствениот излез, не видела никого кој дава насоки за движење.
Нејзиното сведочење се поклопува со исказите на претходните сведоци, што кај адвокатите на одбраната предизвика сомнеж за „инструирани сведоци“.
На ваквите обвинувања, судијката остро одговори: „Како што вие си ги спремате вашите клиенти, така и Обвинителството има право да ги спрема своите предлагани сведоци“.
За Сара и останатите преживеани, трагедијата не завршила на 16-ти март. Покрај траумите, тие сè уште се борат со здравствени компликации предизвикани од вдишувањето на густиот црн чад.
И по една година, секое соочување со вистината во судницата е болно, особено кога судењето се прекинува поради „здравствени причини“ на обвинетите, додека жртвите и нивните семејства секојдневно живеат со трајни последици.
