СЕ ОГЛАСИЈА КОСОВСКИТЕ ВЛАСТИ: Дали би примиле мигранти од Британија?

Владата на Косово е подготвена да разговара со Велика Британија за центри за мигранти. 

Портпаролот на Владата на Косово, Перпарим Криезиу, во изјава за Радио Слободна Европа изјави дека сакаат да му помогнат на Обединетото Кралство, нивен пријател, партнер и сојузник, како и на неговата лабуристичка влада. 

„Веруваме дека е фер да кажеме дека можеме да започнеме дискусии на оваа тема, но сите наши државни институции мора да бидат вклучени, а потоа одлуката ќе зависи од нивните препораки. На многу прашања ќе треба да се одговори однапред“, рече Криезиу.

Меѓународната организација „Хјуман рајтс воч“ (ХРВ) оцени дека Велика Британија и Европската унија треба да престанат да го користат Балканот како „магацин за мигранти“ и повторно ја критикуваше идејата за користење на трети земји како „центри за враќање“ на барателите на азил.

ЕУ и Велика Британија презедоа неколку чекори за преместување на барателите на азил надвор од своите граници како начин за справување со големиот бран мигранти.

При посетата на Албанија на 15 месецов,  британскиот премиер Кир Стармер изјави дека Велика Британија преговара за формирање „центри за враќање со многу земји“.

Според информациите од „The Guardian“ и „The Telegraf“, британските власти веќе оствариле контакти со неколку влади во регионот. Целта е одбиените азиланти да не останат на британско тло, туку да бидат преместени во трети земји, каде ќе чекаат враќање или ќе добијат нова можност за азил.