„Се избегнува да се зборува за трагедијата, но ја поддржувам иницијативата „Кочани 2030“, вели Иван Ивановски од Support Kocani
Иван Ивановски од организацијата Support Kocani изјави дека тие се единствените што се нафатија да собираат донаторски средства за жртвите и блиските настрадани во трагичниот пожар во дискотеката „Пулс“ во Кочани. Според него, главната цел на организацијата е да се најде решение, а не да се бараат виновници.
„Па немаше кој друг, и ние се нафативме. Јас не барам виновници, туку решение. Видовме дека тоа е решението и на тоа се концентрираме. Гледате, во последниот период никого не напаѓаме, не сме во јавноста – се фокусираме на децата“, изјави Ивановски во емисијата Тема на денот на Сител ТВ.
Ивановски признава дека постои тишина околу темата „Кочани“, но ја поддржува иницијативата „Кочани 2030“ која, според него, може да донесе позитивни промени во градот.
„Не сите институции затајиле. Министерството за надворешни работи си ја заврши работата феноменално. Министерството за здравство можеше подобро да реагира, но докторите се вистински херои. Болницата во Кочани не може да се обвини – кој можеше да предвиди ваква катастрофа?“, додаде тој.
Тој потенцира и дека за иднината на градот е клучно да се инвестира во образованието и спортот.
„Треба да се обезбеди факултет во Кочани, како и културно-спортски содржини. Ако го оставиме градот вака, младите ќе си заминат. Веќе после тоа што се случи, младите не се гледаат себеси таму“, предупредува Ивановски.
Финансискиот аналитичар вели дека хуманоста кај народот е силна, а токму благодарение на поддршката од граѓаните, Support Kocani обезбедува специфична медицинска опрема за повредените, како еластични нараквици и скапи лепенки за изгореници.
„Нараквиците чинат од 500 до 3.000 евра и не се еднократни – се менуваат неколку пати. Лепенките се од 20 до 50 евра по парче, а ако некој има неколку изгореници, за секоја треба посебна лепенка. За еден пациент може да требаат и до 300 евра само за лепенки“, објаснува Ивановски.
Организацијата продолжува со активности и повикува на солидарност и долгорочна поддршка за сите погодени од трагедијата.
