СДСМ со контра-обвинувања за случајот АНБ: Дали Мицкоски се плаши дека документите ќе ги откријат неговите врски со странски служби?
Опозициската СДСМ денеска излезе со серија контра-обвинувања во врска со аферата за наводно прислушување, сугерирајќи дека премиерот Христијан Мицкоски одбива да ги декласифицира документите од АНБ не за да сокрие злоупотреба на службите, туку за да ги прикрие сопствените контакти со лица поврзани со странски служби од „непријателски држави“.
Потпретседателот на партијата, Методија Илиевски, на прес-конференција упати низа прашања до власта, со кои го смени наративот на целиот случај.
„Дали е точно дека оперативната обработка на АР и АНБ која власта одбива да ја декласифицира била во врска со откривање на руски агентурни мрежи, екстремизам и финансирање на дестабилизацијата на државата? Дали е точно дека Мицкоски, иако не бил мета на следење, влетал во комуникација со лица кои имале за цел да ја дестабилизираат државата, а биле финансирани од странски пари?“, праша Илиевски.
Од СДСМ изразија сомнеж дека токму содржината на овие документи е причината поради која власта веќе втора недела го одолговлекува нивното објавување и ја саботира работата на надлежната собраниска комисија, чија вчерашна седница, како што рекоа, била „мистериозно откажана“.
Илиевски отиде и чекор понатаму, прашувајќи дали дел од странските финансии наменети за дестабилизација завршиле лично кај премиерот или во партиското седиште на ВМРО-ДПМНЕ. „Дали Мицкоски за торби пари ги продал интересите на сопствената држава на странски непријателски држави?“, беше клучното прашање што го постави потпретседателот на СДСМ.
Поради овие сомнежи, партијата уште еднаш јавно го повика премиерот Христијан Мицкоски итно да ја декласифицира документацијата, бидејќи, како што порачаа, „македонската јавност заслужува да ја знае вистината“.
