СДСМ предлага: Уставните измени да се завршат до февруари 2026 за отворање на првиот кластер со ЕУ
Опозициската СДСМ денеска ја презентираше Предлог-резолуцијата за утврдување на државните и национални позиции за продолжување на евроинтеграцискиот процес, со јасни рокови за спроведување на уставните измени. Лидерот на партијата, Венко Филипче, на прес-конференција истакна дека целта е да се искористи актуелниот моментум за проширување на Европската Унија до 2030 година и да се спречи натамошно заостанување на земјата зад другите кандидати.
Според предложената временска рамка, Владата треба да ги разгледа и евентуално да достави нов текст на уставните амандмани до Собранието најдоцна до 1 декември 2025 година. Парламентарната процедура би започнала веднаш потоа, со прво гласање до 15 декември 2025, додека финалното гласање за измените на Уставот е предвидено најдоцна до 10 февруари 2026 година.
Веднаш по усвојувањето на уставните измени, како што е наведено во резолуцијата, Владата треба да ја извести Европската комисија и земјите-членки дека обврската е исполнета и да побара одржување на Меѓувладина конференција на која ќе се отвори првиот кластер „Темелни вредности“ најдоцна до 15 февруари 2026 година.
Во документот се потврдуваат и „црвените линии“, односно доследно почитување на јазичните, идентитетските, историските и културните особености на македонскиот народ. Се инсистира македонскиот јазик да стане еден од службените јазици на ЕУ без дополнителни забелешки или фусноти.
„Република Северна Македонија е подготвена да ги исполни обврските од Преговарачката рамка, вклучувајќи ги и уставните измени, со јасна определба дека тоа е последната пречка, без прифаќање на нови барања или прашања од билатерален или идентитетски карактер“, се наведува во документот.
Резолуцијата предвидува и механизам во случај на нови блокади поврзани со идентитетски прашања. Доколку се појават такви блокади, претседателот на државата, претседателот на Собранието и премиерот со заедничко писмо би ги информирале највисоките претставници на ЕУ дека овие прашања се затворени.
Од СДСМ потсетуваат на претходни декларации и резолуции усвоени со консензус во Собранието, вклучително и Резолуцијата од 2021 година предложена од тогашната опозициска ВМРО-ДПМНЕ, нагласувајќи ја потребата од проактивен пристап наместо чекање.
Предлог-резолуцијата ќе биде поднесена за усвојување во Собранието. Премиерот и лидер на ВМРО-ДПМНЕ, Христијан Мицкоски, пред десет дена изјави дека со нетрпение ја очекуваат резолуцијата за да можат да дадат свои инпут.
