СДСМ: Царот е гол!
„Царот е гол“. Со оваа метафора од познатата бајка, опозициската СДСМ денеска излезе со жесток брифинг до јавноста, обвинувајќи го премиерот Христијан Мицкоски дека не е самостоен лидер, туку „марионета под директно влијание на Белград“. Социјалдемократите тврдат дека владата на коалицијата ВМРО-ЗНАМ слепо ги копира авторитарните методи на Александар Вучиќ, доведувајќи ја земјата во опасност од регрес, изолација и меѓународни санкции.
Според СДСМ, апсењето на венецуелскиот претседател Николас Мадуро од страна на САД предизвикало паника кај Вучиќ, а следствено и кај Мицкоски, поради страв дека тие би можеле да бидат следни на листата за санкции поради корупција и криминал.
Во партиското соопштение, СДСМ го нарекува Мицкоски „малиот Вучиќ“, истакнувајќи дека тој покажува дволичност во однос на меѓународната политика – јавно ја поддржува акцијата на САД, но истовремено зборува за кршење на меѓународното право, копирајќи го наративот на српскиот претседател.
Опозицијата изнесува тешки обвинувања за економски криминал и поврзаност на владејачката коалиција со сомнителен капитал од Србија. Како конкретен пример ја посочуваат „Алта Банка“, чиј сопственик Давор Мацура е близок до Вучиќ.
СДСМ предупредува на наводен таен договор на Владата за прифаќање мигранти со криминално досие во замена за финансиска помош и зачувување на власта, што, според нив, трајно ќе ги запре ЕУ интеграциите. Партијата тврди дека власта планира „ненадејни, ненајавени, блиц – предвремени избори“ за да ја фати опозицијата неподготвена и да добие мандат за имплементација на овој план.
Опозицијата обвинува дека Македонија се претвора во „Венецуела на Европа“ по теркот на Србија, каде слободата на медиумите се гуши, а политичката пропаганда се финансира со државни пари. Тие потсетуваат на предупредувањата од „Freedom House“ и „Reporters Without Borders“ за притисоците врз новинарите.
СДСМ заклучува дека Мицкоски дозволува реализација на проектот „Српски свет“, блокирајќи го напредокот кон ЕУ преку вештачки конфликти со соседите, само за да избегне европска контрола врз домашното правосудство.
