СДСМ ЈА ОСПОРИ ПРЕД УСТАВНИОТ СУД РЕЗОЛУЦИЈАТА НА ВМРО-ДПМНЕ Ќе се бореле против мигранти, ќе барале помош и од граѓаните и од ЕУ
ВМРО-ДПМНЕ и ЗНАМ усвоија неуставна Резолуција со која директно се загрозуваат слободата на говорот и слободата на политичко дејствување на опозицијата, рече денеска потпретседателката на СДСМ, Јована Тренчевска, која ја оспори резолуцијата пред Уставниот суд.
– СДСМ нема да дозволи гушење на демократијата и слободата на говор. Заедно со граѓаните ќе ја одбраниме Македонија, ќе ја одбраниме демократијата – рече Тренчевска на прес-конференција пред Уставниот суд.
Таа рече дека целта на власта е да ја замолчи опозицијата и да се забрани каква било дебата за договорот мигранти за пари.
– Секој што ќе зборува јавно за мигранти, да се таргетира со закани за кривични пријави и затвор. Затоа и забрзано работат на воспоставување контрола врз судството и обвинителството. Кога се носат неуставни резолуции против опозицијата, тоа е автократија – вовед во диктатура, режим – рече Тренчевска.
Таа посочи дека СДСМ ова нема да го дозволи и силно ќе се спротивстави, а граѓаните ќе им се приклучеле.
– Ќе поднесеме претставка до Уставниот суд за уривање на уставниот поредок. Предавничката Резолуција е спротивна на Уставот во делот на основни човекови слободи и права на граѓанинот – слободата на изразување која е неприкосновена. И тоа ја прави неуставна. Ќе се обратиме до сите релевантни меѓународни институции, ќе побараме помош и од институциите на ЕУ, од сестринските партии во Европа. Со сите демократски алатки и механизми што ни стојат на располагање ќе се бориме за Македонија, за слободата и демократијата. Борбата продолжува – посочи Тренчевска.
Собранието вчера попладне со 65 гласа „за“ и 5 гласа „против“ ја донесе „Резолуцијата за осуда на манипулациите на опозицијата и за потврда на политиките против нелегалната миграција“.
Координаторот на пратеничката група на ВМРО-ДПМНЕ, Никола Мицевски во образложението истакна дека парламентарното мнозинство и Владата имаат јасна, доследна и непроменлива политика против нелегалната миграција. Тој потенцираше дека Владата никогаш не побарала, не договорила и нема да дозволи изградба на мигрантски кампови или трајно сместување мигранти на територијата на општините во државата. Со оваа Резолуција, како што посочи, се става крај на сите шпекулации и намерно пласирани невистини.
Во врска со јавниот говор, во делот кој Тренчевска го толкува како забрана на слободата на изразување, во Резолуцијата се вели: Се повикуваат сите политички субјекти и јавни чинители на одговорност во јавниот говор, почитување на фактите и воздржување од ширење лаги и
манипулации кои можат да предизвикаат општествени тензии и да го нарушат
јавниот ред и мир.
Со Резолуцијата пратениците утврдија дека не бико побарано, ниту е договорено, ниту ќе биде дозволено воспоставување мигрантски кампови, прифатни центри или трајни форми на
сместување мигранти во Македонија и дека таквите активности не се и нема да бидат дел од владините политики.
.
