Салиу за ромската заедница која протестира против Сејф Сити: Со образование ќе им се овозможи легална и безбедна можност за возење
Во повеќе градови денеска продолжија протестите на граѓани од ромската заедница кои бараат да им се дозволи да возат без возачка дозвола, а најголемо внимание привлече Плетвар, каде се формираа долги колони и чекање со часови. Протести имаше и пред полициските станици во Битола и Струмица, како и во Прилеп, Ресен, Штип и Кочани.
Министерот задолжен за интеграција на ромите, Салиу, апелираше демонстрантите да останат смирени, нагласувајќи дека потеклото од ромската заедница не ги ослободува од почитување на законите. Тој потенцира дека разговарале со министерката за образование за обезбедување можност и финансиска поддршка за завршување на основното образование на граѓаните од ромската заедница, со што тие би можеле понатаму да полагаат за возачка дозвола.
– „Со образование ќе им се овозможи легална и безбедна можност за возење, наместо да ризикуваат со возење без дозвола и со закани за јавен ред“, изјави Салиу.
Ситуацијата на терен беше тензична. На автопатот Битола–Охрид беа запалени гуми, а сообраќајот беше блокиран, додека пред судот и полицијата во Битола демонстрантите побараа присуство на инструктор кој ќе потврди дека знаат да возат. Жените останаа на автопатот, а мажите се префрлија пред институциите.
И во Штип и Кочани се палеа гуми, по што интервенираше пожарната за да се нормализира состојбата.
Од МВР денеска соопштија дека за сите видови на протести ќе одговорат согласно надлежностите за да се обезбеди стабилен јавен ред и мир. Засега нема уапсени лица.
