САД привремено ја запираат обработката на имигрантски визи за македонски граѓани
Американските власти најавија привремено сопирање на процесирањето на имигрантски визи за граѓани од 75 земји, меѓу кои и Северна Македонија, јавува „Фокс њуз“ повикувајќи се на интерен меморандум на Стејт департментот.
Според документот, конзуларните службеници добиле упатство да ги одбиваат апликациите за имигрантски визи додека трае преоценка на процедурите за проверка и селекција на апликантите. Мерката ќе стапи на сила од 21 јануари и ќе трае додека американските власти не ја завршат ревизијата на целиот систем за издавање имигрантски визи.
Причината за привремената пауза е спречување на влез на лица кои би можеле да зависат од државна помош, преку примена на одредбата за „јавен товар“. Конзуларните службеници ќе имаат овластување да одбиваат визи доколку проценат дека апликантот веројатно ќе користи јавни средства.
Проценката ќе се врши според повеќе критериуми, меѓу кои се возраст, здравствена состојба, финансиска стабилност, познавање на англиски јазик и евентуална потреба од долготрајна медицинска нега. Негативно влијание може да има и претходно користење на социјална помош или институционална грижа.
Од Стејт департментот појаснуваат дека ќе има исклучоци „во многу ограничени случаи“ и само по завршена проценка за ризик од станување јавен товар.
За македонските граѓани ова значи дека апликациите за имигрантска виза кон САД ќе бидат ставени во мирување без јасна временска рамка за продолжување на постапката. Покрај Македонија, на листата на опфатени држави се Косово, Црна Гора, Босна и Херцеговина, Србија, Албанија, како и Русија, Иран, Ирак, Египет, Нигерија и други.
Американските медиуми потсетуваат дека одредбата за „јавен товар“ постои со децении, но нејзината примена варирала во зависност од администрацијата. Таа беше проширена за време на Доналд Трамп, делумно укината во следната администрација, а сега повторно се активира во построга форма, со што директно се засегаат и македонските апликанти кои планирале трајно иселување во САД.
