Руте ќе го замени Столтенберг на чело на НАТО?
Соединетите држави и Велика Британија во четвртокот го поддржаа холандскиот премиер во заминување Марк Руте да го наследи Јенс Столтенберг на функцијата генерален секретар на НАТО, ставајќи го во силна позиција да ја преземе функцијата.
Наследникот на Столтенберг, откако ќе поднесе оставка во октомври, ќе ја преземе функцијата во клучен момент со задача да ја задржи поддршката на членките на НАТО за скапата одбрана на Украина од руска инвазија, истовремено чувајќи се од каква било ескалација што директно би го вовлечела Алијансата во војна со Москва.
„Претседателот Бајден силно ја поддржува кандидатурата на премиерот Руте да биде следниот генерален секретар на НАТО“, рече еден американски претставник.
„Премиерот Руте има длабоко разбирање за важноста на Алијансата, е природен лидер и комуникатор, а неговото водство добро ќе и служи на Алијансата во овој критичен момент“, додаде тој.
Во зависност од исходот на американските претседателски избори во ноември, следниот шеф на НАТО можеби ќе треба да се справи со втор мандат на Доналд Трамп, кој неодамна уште еднаш ја доведе во прашање неговата посветеност на одбраната на сојузниците во НАТО.
Трамп привлече жестоки критики од западните официјални лица на почетокот на овој месец затоа што сугерираше дека нема да ги заштити земјите кои не ги исполнуваат целите за одбранбени трошоци на Алијансата, па дури и ќе ја охрабрат Русија да ги нападне.
Фаворит за челната позиција во НАТО
Но, Руте, кој веќе се сметаше за фаворит за највисокото место во НАТО, во саботата рече дека Европа треба „да престане да стенка, кука и да се жали“ за Трамп и наместо тоа да се фокусира на она што тој може да направи за Украина.
„Мораме да работиме со кој и да е на подиумот“, рече Руте на конференцијата за безбедност во Минхен.
Најдолговечниот холандски премиер Руте (57) неочекувано најави дека се повлекува од холандската политика во јули, но ќе остане премиер додека траат коалициските разговори по изборите на 22 ноември.
