Русковска го пријавила Боки 13 за вознемирување
Поранешната специјална јавна обвинителка Вилма Русковска пријавила во полиција дека била предмет на телефонско вознемирување од страна на Бојан Јовановски, познат како Боки 13.
Како што е наведено во пријавата, настанот се случил вечерта на 18 декември 2025 година, кога Јовановски, за време на директно вклучување на својот Јутјуб-канал, во повеќе наврати ѝ се јавувал телефонски, и покрај тоа што таа ги одбивала повиците.
Дел од настанот е документиран и на видео-снимка што се прошири на социјалните мрежи, на која се слушаат навредливи и вознемирувачки изјави упатени кон Русковска. Таа, според пријавата, го предупредила дека ќе се обрати во полиција доколку не престане со повиците, но контактите продолжиле и по тоа.
Од Министерството за внатрешни работи ја потврдија пријавата и соопштија дека се преземаат активности за утврдување на сите околности поврзани со случајот.
