Русија го казни уредникот на весникот „Новаја газета“ за „дискредитација на армијата“
Руските власти денеска го казниле новинарот Сергеј Соколов, уредник на весникот „Новаја газета“ поради дискредитација на армијата, откако претходно бил приведен, објави весникот, цитиран од Ројтерс.
Случајот се однесува на статија објавена во Новаја Газета во декември 2023 година и насловена „Ничии момчиња“, која се однесува на руски сирачиња кои потпишале воени договори да се борат во Украина, соопштија руските власти.
Новаја газета во своето старо онлајн издание објави дека причината за приведувањето на Соколов е прикажувањето на руската армија во написот, но не наведе повеќе детали.
Окружниот суд во Москва подоцна го казни Соколов со 30.000 рубли (327,88 долари) откако беше прогласен за виновен за омаловажување на руските вооружени сили, што е административен прекршок.
ТАСС објави дека Соколов „објавил материјал на каналот „Новаја газета“ во Телеграм, во кој има „знаци на вербална дискредитација на акциите“ на армијата.
Новаја Газета е позната по своите истраги, кои понекогаш се насочени кон Кремљ, владините политики и високи поединци.
Поранешниот главен уредник на весникот, Дмитриј Муратов, добитник на Нобеловата награда, поднесе оставка во септември откако властите го означија како „странски агент“, етикета што Москва ја користи за луѓе за кои вели дека работат против руските државни интереси.
