Руне го збриша Алкараз за прва титула во Барселона

Втора година по ред, титулата од овој турнир нема да оди во рацете на шпански тенисер и покрај тоа што Алкараз имаше можност да ја врати доминацијата на својата земја. Во 21. век, 12 титули освои Надал, две Алкараз, по една Вердаско, Робредо и Моја, а само понекогаш ќе се појавеше некој странец како Гаудио, Нишикори, Тим или лани Руд, а сега Алкараз го претрпе првиот пораз во своето трето финале.

Во првиот сет двајцата тенисери освоија по еден брејк, Руне имаше две сет-топки во десеттиот гем, но не успеа да го освои и сетот отиде во тај-брејк. Во него имаше дури седум мини-брејка, Алкараз не ја искористи својата шанса на 3-1, Руне потоа водеше со 6-4, но го освои со 8-6.

Во вториот сет Алкараз се мачеше со болки во грбот, побара и еден медицински тајм-аут и веројатно тоа беше причината за нешто послабиот настап што резултираше со лесен сет за Руне за конечна победа и петта АТП титула за данскиот тенисер.

Поради поразот, Алкараз ја загуби втората позиција на АТП листата која сега му припаѓа на Зверев за само 35 бода разлика. Далеку пред нив е Јаник Синер со безмалку 2.000 бода предност.