РОКОТ НАСКОРО ИСТЕКУВА, ДАВААТ 7.000 ЕВРА НЕПОВРАТНО ЗА ОТВОРАЊЕ БИЗНИС ВО СРБИЈА: Како функционира германската програма?

Претприемачите од дијаспората кои имаат идеја за започнување
сопствен бизнис во Србија сега имаат можност да добијат финансиска поддршка
благодарение на програмата што ја спроведува Германската организација за
меѓународна соработка (ГИЗ). Наскоро ќе биде отворен нов повик за аплицирање за
грантови, а сите заинтересирани ќе можат да аплицираат до 9 март преку
платформата diaspora2030.de.

Како функционира
програмата?

Според Снежана Антонијевиќ од ГИЗ, ова е глобална миграциска
програма во контекст на развој, која им овозможува на претприемачите да
аплицираат за финансиска поддршка. Процесот на аплицирање вклучува пополнување
формулар, изработка на бизнис план и поднесување на CV, по што на избраните
кандидати им се дава можност да ја презентираат својата идеја усно во период од
пет минути.

Со програмата се предвидени грантови во износ од 7.000 евра,
со кои може да се креира веб-страница, апликации, да се платат административни
трошоци при основање компанија, како и за различни услуги. Покрај финансиската
поддршка, на учесниците им се обезбедуваат и консултантски услуги кои ќе им
помогнат да се движат низ административните и правните процеси во Србија.

– Изборот на бизнис идеи се заснова на нивната иновативност
и потенцијал за развој, со посебен фокус на дигитализацијата, родовата
еднаквост, заштитата на животната средина и здравствениот сектор – нагласува
Антонијевиќ.

Искуства на успешни
претприемачи

Еден пример за успешна имплементација на бизнис идеја преку
оваа програма е советувалиштето за доење Сунчев зрак, кое во Србија го отвори
Јелена Периќ, педијатриска медицинска сестра од Минхен.

– Работев на неонатологија 12 години, а по специјализацијата
за доење решив да основам сопствено советувалиште. Со поддршка на ГИЗ и ментори
од Србија и Германија успеав да ја постигнам целта – вели Периќ.

Како најголеми предизвици при започнување бизнис ги посочува
бирократијата и правните пречки, но нагласува дека благодарение на нејзините
ментори успеала да ги надмине. „Добивме поддршка во секој сегмент – од основање
компанија, плаќање даноци, до проблеми со двојното оданочување. Сите информации
беа прилагодени на моите потреби“, додава таа.

Нејзиното советувалиште успешно работи веќе четири години,
организирајќи консултации преку Интернет и во живо, домашни посети и семинари,
а целта е да им обезбеди поддршка на родителите и да го олесни периодот на
доење.

Зголемен интерес за програмата

Програмата ГИЗ постои од 2011 година и низ неа поминале
голем број претприемачи од дијаспората.

– Предизвиците се менуваа со текот на времето – претходно
кандидатите имаа проблеми да дојдат во Србија и да го истражуваат пазарот,
особено за време на пандемијата. Денес, со поголема мобилност, гледаме се
поквалитетни бизнис идеи – вели Антонијевиќ.

Меѓу успешните проекти кои произлегоа од оваа програма се
апликацијата Spona на Михаило Вилигориќ, која ги поврзува српските
производители со менаџери ширум светот, како и софтверското решение Miles
Technology, кое ја оптимизира испораката на производите.

ГИЗ континуирано ја подобрува програмата, додавајќи вебинари
за инвестиции и претприемништво, како и поддршка од локални ментори.

– Со нетрпение очекуваме нови идеи и можност да им помогнеме
на луѓето од дијаспората да ги постигнат своите деловни цели во Србија –
заклучува Антонијевиќ.