Филипче: Со падот на Орбан, ќе бега ли Груевски во Русија или ќе се врати во Македонија?
Лидерот на СДСМ, Венко Филипче, отвори серија прашања за иднината на поранешниот премиер Никола Груевски, поттикнати од политичките превирања во Унгарија и најавите на новата власт во Будимпешта.
„Се поставува прашањето што ќе прави Никола Груевски сега кога веќе го нема својот заштитник во Будимпешта? По години уживање гостопримство, дали тој ќе бега во Русија или на друго место, или пак ќе се врати во Македонија за да ја отслужи затворската казна?“, изјави Филипче.
Филипче ја поздрави изјавата на Петер Маѓар, мандаторот за состав на новата унгарска влада, кој вети дека државата повеќе нема да биде прибежиште за лица кои бегаат од законот. Маѓар во своето последно обраќање беше дециден дека тоа важи и за Груевски.
Лидерот на опозицијата упати директни критики и до македонската Влада, барајќи конкретни чекори во новонастанатата ситуација.
„Го поставуваме прашањето до Владата на ВМРО-ЗНАМ: Дали е поднесено ново барање за екстрадиција на Груевски? Ако не е поднесено, зошто се чека и дали планираат тоа да го сторат уште денес?“, истакна Филипче.
Прашањето за екстрадицијата на Груевски се актуализираше по изборниот пораз на Виктор Орбан, чија влада во 2018 година му додели политички азил на поранешниот македонски премиер. Со доаѓањето на Петер Маѓар, кој најавува радикално расчистување со досегашните пракси, позицијата на Груевски во Будимпешта станува неодржлива.
