Ревизија: Скопски „Водовод“ загубил 16,5 милиони евра зошто снабдувал приватна компанија со поевтина вода
Државниот завод за ревизија по извршената ревизија на „Водовод и канализација – Скопје“ му препорача на јавното градско претпријатие да ја преиспита одлуката за висината на тарифата која ја наплатува од акционерско друштво во приватна сопственост по многу поевтина цена.
Ревизорот во својот извештај објавен денеска не посочува за кое акционерско друштво станува збор, но на скопски „Водовод“ му порачува реално да ја определи вредноста на извршената услуга за снабдување со вода на оваа компанија.
Според ревизорите, во периодот од 2016 година до периодот на извршување на ревизијата, цената за услугата за снабдување со вода за пиење за едно АД во приватна сопственост е значително пониска од цената на услугата за категоријата „стопанство“, поради што ЈП „Водовод и канализација“ – Скопје остварило за над 1,02 милијарди денари (околу 16,5 милиони евра) помалку приходи по основ на услугата за користење на вода.
Со тоа искажало помал ДДВ за 100,883 милиони денари (околу 1,6 милиони евра) и помал надоместок за користење на води за 22,705 милиони денари (околу 368.000 евра), што претставува приход на државниот Буџет.
Од спроведената анализа е констатирано дека во периодот од 2017 до 2021 година, трошоците за ангажирани адвокати, нотари и извршители за изготвување на нотарски платни налози за заостанати долгови, изнесуваат приближно 8 милиони евра.
Во 2021 година овие трошоци изнесуваат вкупно 116,021 милиони денари или 1,9 милион евра за 72.331 постапки, а наплатените побарувања во истата година изнесуваат од 94,704 милиони денари или околу 1,5 милиони евра.
– Причина за особено високите износи на трошоци за ангажирање на нотари и адвокати произлегува од член 68 од Законот за нотаријатот, со кој меѓу другото е пропишано дека за парично побарување за вода и смет во вкупен износ над 6.000 денари, предлогот за издавање на решение за нотарски платен налог задолжително го составува адвокат и мора да содржи адвокатски печат и потпис, се додава во извештајот.
