РЕСЕНСКИ ГАЗДИ СЕ ОПАРИЈА: Австрискиот гигант за сокови „Раух“ официјално нов сопственик на „Вита-Рес“
Австрискиот гигант „Раух“ (Rauch Fruchtsafte GMBH), еден од водечките производители на сокови во Европа, официјално е нов сопственик на ресенската фабрика за преработка на овошје и еден од најголемите откупувачи на јаболка во земјата Вита-Рес.
Сопственикот на брендовите од “Happy Day“ до “Bravo“, “Nativa“ и “Rauch IceTea“ е нов газда од крајот на минатиот месец по завршените процедури и проверката од страна на Комисијата за заштита на конкуренција која беше објавена во јули.
Единствено не е познато колкава компензација добиле од продажбата досегашните локални сопственици Тони Кебиловски и Љупчо Стојчевски, и двајцата од Ресен. Нови управители на Вита-Рес сега се Дитмар Хамерер од Волфурт, инаку од бордот на директори на самата централа, како и Перица Алексиќ од Белград.
Од она што успеа „Фактор“ да го провери, Вита-Рес лани имала приходи од 3,8 милиони евра, но и загуба од околу 165.000 евра. Иако се води како основана од 2005, во 2023 настанува со спојување на две друштва – „Агро Трејд 2006“ и „Фруит Џуице“. Дејноста е производство на сокови од овошје и зеленчук, а официјално имала само еден пријавен работник лани.
Производите на „Раух“ се продаваат во повеќе од 100 земји, компанијата има 14 фабрики со над 2.400 вработени, но и подружници и партнерски производители во Европа и САД. Компанијата е основана во 1919 година и до денес е фамилијарен бизнис, кој го води четвртата генерација од семејството Раух.
Седиштето на компанијата „Вита-рес“ е во Ресен. Станува збор за компанија која е директно активна во секторот за преработка на овошје и производство на производи добиени од обработката на овошјето (овошни концентрати, овошно пире и овошни смрзнати коцки). „Вита-рес“ пласира производи на пазарот во Европа и во Македонија. Вкупниот приход на компанијата остварен во Македонија е поврзан во главно со продажба на полу-готови производи добиени од обработката на овошјето (овошни концентрати, овошно пире и овошни смрзнати коцки).
„Во целина, Групацијата на претпријатија РАУХ ФРУЦХТСАФТЕ зазема три стратешки бизнис полиња. Покрај производството и продажбата на Раух брендовите од “Happy Day“ до “Bravo“, “Nativa“ и “Rauch IceTea“, Раух е етаблиран и во B2B сегментот. Во рамките на оваа гранка, компанијата Раух ја има улогата на производител и продажна компанија за интернационалните купувачи на овошни концентрати и полу-производи. Третото поле се однесува полнењата по лиценца. Како добавувач на услуги, Раух полни за други производители на пијалаци со својата екпертиза и врвни системи и линии за полнење на лименки, ПЕТ (пластика), картонски (пр. Тетра Пак) и стаклени шишиња. РАУХ ФРУЦХТСАФТЕ моментално има контрола над повеќе друштва што може да се утврди од ВИТА РЕС, директно е активен во сектор за преработка на овошје и производство на производи добиени од обработката на овошјето (овошни концентрати, овошно пире и овошни смрзнати коцки)“, ова пак го објави Комисијата за заштита на конкуренцијата кога во јули беа најавени намерите за преземање.
А.К.
