Ремс ја продолжи чудесната серија со џиновски пресврт, Марсеј победи за второ место
Жоао Виктор е трагичарот кој на Марсеј практично му го обезбеди триумфот со автоголот во 57-та минута, за најновото зимско засилување, Мароканецот Унахи да стави печат на победата во 90+3-та минута. Марсеј веќе седум меча е во сериија без пораз, во која ја запиша четвртата победа и сега има 46 бода како второпласиран, бод пред Ланс, а два зад ПСЖ, кои вечерва ги играат своите мечеви од ова вонредно коло во Лига 1.
Ремс на Лориен му даде предност од два гола, ама ако сите помислија дека дојде денот за да се прекине неверојатната серија која без пораз трае уште од средина на септември, се излажаа зашто Форлан Белогун со хет-трик донесе триумф со 4-2 и покрај негативата од 0-2 после повеќе од пола час игра.
Лориен преку Ле Фе (10.) и Коне (36.) дојде до огромна предност, но Белогун, кој пред три дена го шокираше ПСЖ за ремито 1-1, од пенал минута пред полувремето намали, а потоа во триминутен блиц-криг од 61-та до 64-та минута даде уште два гола за да ја обезбеди победата, откако Думбија во 51-та погоди за израмнување.
Со ова Ремс е во серија од 13 меча без пораз, иако е далеку од позиции за Европа, моментно на деветото место со 29 бода.
Ажаксио со 2-1 го победи Анже, а Тулуз со 4-1 ја сомле Троа. Лил и Клермон одиграа реми без голови во другите три меча од првиот дел од вечерашното вонредно коло.
