РЕК Битола го раскина договорот со својот најголем партнер за ископ и испорака на јаглен
РЕК Битола еднострано го раскина договорот за ископ на јаглен и меѓуслојна јаловина со фирмата „Марковски компани“, информира денеска директорот на Комбинатот, Тони Петрушевски.
Престанувањето на соработката, како што рече директорот, е поради несовесно и неквалитетно извршување на преземените обврски. На раскинувањето на соработката, како што кажа, и претходеле опомени и укажувања од раководството на РЕК Битола, дека операторот не ги реализира договорните обврски според утврдениот обем, динамика и квалитет.
– Со раскинувањето на соработката активирана е и банкарската гаранција во износ од 120 милиони денари поднесена од предметната фирма. Носителот на набавката не ги испочитува предвидените обврски за одговорно, целосно, стручно, квалитетно, совесно и навремено извршување на задачите согласно техничката спецификација. Овој економски оператор, со неодговорно постапување, покрај тоа што во континуитет не успевал да ги испорача договорените количини на јаглен, директно ја загрозил енергетската стабилност на државата.
Во тој контекст, со несоодветна динамика за отстранување на јаловинските маси ја нарушил геомеханичката стабилност на рудникот Брод Гнеотино. Поради неиспорачаните количини и кршењето на договорните обврски од страна на предметниот оператор, РЕК Битола бил принуден да врши дополнителна набавка на јаглен за да овозможи стабилна и континуирана работа на блоковите во ТЕ „Битола“, појасни Петрушевски.
Тој додаде дека иако претходеле укажувања, продолжил несериозниот однос со кршење и непочитување на договорените обврски на „Марковски компани“.
Мултимилионскиот договор со „Марковски компани“ беше склучен на 13 февруари, а актуелната власт, тогаш како опозиција, реагираше дека тендерот е криминален.
