Речиси 1.600 Палестинци се убиени, а исто толку се ранети
Од саботата веќе се убиени 537 Палестинци, повеќе од 1.600 се повредени, објави палестинското Министерство за здравство.
25 Палестинци загинаа кога израелско гранатирање погоди куќа во бегалскиот камп Џабалија во северниот дел на Појасот Газа, објавија локалните медиуми. Според палестинскиот министер за внатрешни работи, жртвите се двојно повеќе. Ејад Бозум рече дека загинале најмалку 45 луѓе од едно семејство. Тој објасни дека многу роднини се собрале во семејната куќа во центарот на кампот поради гранатирањето.
Хамас ги повика меѓународните хуманитарни организации да обезбедат итна помош за Палестинците откако Израел го прекина снабдувањето со стоки, вода и електрична енергија на територијата. Палестинскиот министер за здравство вчера изјави дека здравствената заштита таму пропаѓа поради недостигот на залихи, лекови и банки за крв.
Палестинскиот лидер Махмуд Абас зборуваше за прв пат од почетокот на нападите на Хамас во саботата и го осуди насилството и убиствата на цивили од двете страни. Абас е во посета на Јордан, каде што се сретна со кралот на земјата Абдула. Палестинскиот лидер рече дека властите што ги предводи се против насилни акции и дека ќе користат политички средства за да ја постигнат оваа цел.
Реакција дојде и од египетскиот претседател Абдел Фатах ал-Сили, кој рече дека Палестинците „мора да останат цврсти и да го задржат своето присуство на нивната земја“. Египет исто така побара запирање на израелското гранатирање во близина на преминот Рафах. Министерството за надворешни работи во Каиро на Фејсбук соопшти дека контролниот пункт е отворен, но дека објектите на палестинската страна биле уништени од нападите.
Во исто време, израелскиот Совет за безбедност и Министерството за надворешни работи во Тел Авив ги повикаа Израелците ширум светот да бидат внимателни поради Денот на гневот што денеска го прогласи Хамас. Израелските власти очекуваат повеќе демонстрации на различни локации кои би можеле да станат насилни.
Евентуалното отворање на нов фронт против Израел ќе зависи од израелските акции во Појасот Газа. Ова го изјави иранскиот министер за надворешни работи Хосеин Амир-Абдулахиан, кој е во посета на Ирак.
Западот издаде серија предупредувања против можна интервенција на Исламската Република во конфликтот. Иранските претставници од нивна страна рекоа дека немаат никаква врска со нападите извршени од палестинската група.
Во меѓувреме, по државниот секретар Ентони Блинкен, во Израел ќе пристигне и американскиот министер за одбрана Лојд Остин. Остин ќе се сретне со премиерот Нетанјаху, членовите на новата израелска влада за вонредни состојби и воени претставници.
Денеска во земјава се очекуваат и неколку министри за надворешни работи и европски лидери. Тоа се министрите на Канада Мелани Џоли, на Германија – Аналена Бербок и на Италија – Антонио Тајани. Во посета се и претседателката на Европската комисија Урсула фон дер Лајен и претседателката на Европскиот парламент Роберта Мецола.
