Расте цената на нафтата и на лондонскиот и на американскиот пазар! Еве колку чини барел
Цените на нафтата во четвртокот во Лондон останаа близу 80 долари, бидејќи растот на залихите и рекордното американско производство ги засени нервозата поради глобалните трговски нарушувања во Црвеното Море.
Цената на барелот на лондонскиот пазар благо зајакна, за 13 центи во однос на претходното затворање, на 79,80 американски долари. На американскиот пазар барелот се тргува по непроменета цена од 74,26 долари.
Американската влада во средата соопшти дека залихите на сурова нафта во САД се зголемиле за 2,9 милиони барели на 443,7 милиони барели минатата недела. Аналитичарите предвидуваа пад од 2,3 милиони барели. Исто така, владата објави дека минатонеделното производство на сурова нафта во САД достигна историски максимум од 13,3 милиони барели дневно.
Цените на нафтата на двата пазари пораснаа трет по ред трговски ден во средата, поттикнати од загриженоста на инвеститорите за трговските пореметувања бидејќи главните авиопревозници ги избегнуваат рутите на Црвеното Море, а подолгите патувања низ Африка ги зголемуваат трошоците за превоз и осигурување. Околу 12 отсто од светскиот поморски сообраќај минува низ Црвеното Море и Суецкиот канал. Но, засега, влијанието врз испораките на нафта е ограничено, велат аналитичарите, бидејќи најголемиот дел од нафтата на Блискиот Исток се извезува преку Ормутскиот Теснец.
– Сметаме дека има мали шанси нарушувањата да имаат трајни последици врз цената на енергијата… Пренасочувањето на бродовите ги забавува глобалните синџири на снабдување, но не и обемот на производство – рече Ехсан Хоман од МУФГ. Тој додаде дека дополнителните трошоци направени од подолгите патувања околу Кејп на Добрата надеж во Јужна Африка „се закануваат да го разгорат пламенот на глобалната инфлација исто како што американската централна банка, ФЕД, сигнализираше дека се подготвува да ги намали стапките во 2024 година.
Организацијата на земјите извознички на нафта ( ОПЕК ) одделно извести дека барел нафтена кошница на нејзините членки во средата поскапе за 2,05 американски долари на 81,24 американски долари.
