РАДЕВ ДО СРПСКИТЕ ВЛАСТИ: Патот на земјата кон ЕУ може да биде отворен само ако се почитуваат правата на Бугарите

Бугарскиот претседател Румен Радев денеска упати порака до Србија дека патот на земјата кон ЕУ може да биде отворен само ако се почитуваат правата на Бугарите во таа држава.

„Бугарија е главниот мотор на европската интеграција на земјите од Западен Балкан, а основниот критериум со кој ќе дадеме поддршка е состојбата на нашите сонародници во секоја земја – условите за нивниот економски и социјален развој, а пред сѐ нивниот можност да го одбранат својот национален идентитет, јазик, култура, историска меморија“, вели тој. 

Ова порака ја упати Радев на свеченото доделување на Орденот „Стара Планина“ на истакнатата личност на бугарското национално малцинство во Србија и на претседателот на Културно-информативниот центар „Босилеград“, Иван Николов.

„Со одбрана на правата и слободите на нашите сонародници во Република Србија и спротивставувајќи се на секакви обиди за посегнување на историската вистина, Иван Николов се етаблира како вистински морален столб“, рече Радев. 

Тој додаде дека ќе продолжи активно да работи со српското државно раководство за решавање на проблемите на Бугарите во Србија.

Радев истото го зборува и за Македонија. Бугарите во Србија во најголем број живеат во две општини на југоистокот на државата – Босилеград и Димитровград. Според последниот попис од 2022 во Србија има 13.000 Бугари. Тие претставуваа 0,2 отсто од вкупното население во Србија.  Инаку, бугарскиот европратеник Ангел Џамбаски одеше и во Приштина, од каде порача дека и на Косово имало Бугари.