Прва трансплантација на коска од починат дарител кај 13-годишно дете со брахидактилија на Клиниката за ортопедски болести
На Универзитетската клиника за ортопедски болести во Скопје е направен значаен чекор напред во медицината – успешно е извршена трансплантација на коска со имплант, земена од починат донор. Коска од донорот е имплантирана на два прста кај 13-годишно дете со брахидактилија, соопшти Министерството за здравство.
Како што наведуваат од Министерството, ова е прв ваков вид трансплантација во нашата земја, а детето е во стабилна состојба и има уреден постоперативен тек.
„Изразувам искрена благодарност и честитки за целиот тим предводен од д-р Даница Поповска и доц.д-р Илир Шабани, како и на сите здравствени работници кои учествуваа во оваа трансплантација – д-р Лилјана Ангелеска, д-р Теодора Божиновска, д-р Филип Видоевски, инструментарки Сузана Пејчиновска, Арјета Мемети, анестетичар Менка Дојчиновска, радиолошки технолог Крешник Шеху и гипсер Ирена Галевска. Заедно ќе продолжиме со уште посилно темпо да ја подигнуваме свесноста за овој највисок акт на човекољубие“, истакна проф.д-р Билјана Кузмановска, национален координатор за трансплантација.
Инаку, пред три години, на истата клиника беше изведена и првата трансплантација на лигамент од починат дарител, кога 34-годишен пациент со сериозна повреда на десното колено доби мекоткивен графт од донор.
