ПРОБЛЕМ ЗА СРБИТЕ НА КОСОВО: На Јариње e запрена уште една пратка со динари
Нови проблеми за косовските Срби. На преминот Јариње денеска e запрена уште една пратка со динари за Косово.
Директорот на српската владина Канцеларија за Косово и Метохија Петар Петковиќ изјави дека на административниот премин Јариње е забранета уште една пратка динари наменета за исплата на плати, пензии и социјални надоместоци за Србите и другите неалбански жители на Косово, чиј опстанок зависи од приливот на средства од буџетот на Република Србија, јави дописникот на МИА од Белград.
„Припадниците на полицијата на Курти не само што забранија влез на динари, туку на административниот премин демонстрираа грубост кон претставниците на Народната банка на Србија (НБС) и компанијата Хендерсон, а потоа ги избркаа со закана за апсење“, вели Петковиќ.
Додава дека косовскиот премиер Албин Курти со тоа „јасно покажал дека таканаречениот преоден рок е чиста лага и дека цело време работи на операционализирање на одлуката за забрана на динарот“.
Една пратка динари веќе беше вратена на 7 февруари на преминот Јариње без никакво објаснување или официјално одбивање.
Србите деновиве протестираа со барање меѓународната заедница да реагира. Западните земји го повикаа Косово да ја одложи одлуката, но тоа не се случи. Косовските власти инсистираат на употреба на еврото.
