Пристигна првата реакција на Украина на американскиот ултиматум
Украина е подготвена да преговара, но не и да се предаде, изјави денеска украинската вицепремиерка Јулија Свириденко, откако медиумските извештаи открија детали од американскиот предлог за договор со кој Украина би се откажала од речиси целата територија окупирана од Русија.
„Нема да има договор што и дава на Русија посилна основа да се прегрупира и да се врати со поголемо насилство. Нашиот народ нема да прифати замрзнат конфликт преправен во мир“, напиша Свириденко на платформата Х.
Ултиматум на САД
Медиумите оваа недела објавија детали за предлогот на Вашингтон за договор меѓу Киев и Москва, кој предлага официјално признавање на окупираниот украински полуостров Крим како руски, како и задржување на „де факто“ контролата на Москва врз поголемиот дел од освоената територија.
Американскиот потпретседател Џеј Ди Венс рече дека Соединетите Држави дале „многу јасен предлог“ до Русија и Украина за можното мировно решение, велејќи дека е „време тие да се согласат или САД ќе се повлечат од процесот“.
Украина, од друга страна, се залага за целосен, итен и безусловен прекин на огнот, со преговори да продолжат откако ќе се воспостави.
„Првиот чекор мора да биде целосен прекин на огнот“
„Целосен прекин на огнот – на копно, во воздух и на море – е неопходен прв чекор“, рече Свириденко, додавајќи дека Киев ќе одговори исто доколку Москва се одлучи за ограничена пауза.
Рускиот претседател Владимир Путин понуди да ја запре неговата инвазија на Украина по сегашната линија на фронтот, како дел од напорите за постигнување мировен договор со американскиот претседател Доналд Трамп, објави вчера Фајненшл тајмс, цитирајќи луѓе запознаени со ова прашање.
