ПРЕСУДА ЗА НАПАЃАЧОТ НА НОВИНАРИ: Горан Спасов доби условна казна и задолжително психијатриско лекување
Основниот кривичен суд Скопје денеска (29.12.2025) донесе пресуда за Горан Спасов, обвинет за напад врз новинари. Тој е прогласен за виновен, но нема да оди во затвор доколку во наредните пет години не стори ново кривично дело и ако се придржува до мерката за задолжително лекување.
Судот му изрече алтернативна мерка – условна осуда со заштитен надзор.
Утврдена му е казна затвор од 2 (две) години, која нема да се изврши доколку во рок од 5 години не го повтори делото.
Што значи „Заштитен надзор“?
Покрај условната казна, на Спасов му се наложени строги обврски во траење од 4 години. Клучната мерка е задолжително подложување на лекување или социјална рехабилитација во соодветни специјализирани установи.
Доколку не ја почитува оваа обврска и не оди на лекување, условната казна ќе биде отповикана и тој ќе биде испратен на издржување на двегодишната затворска казна.
Признание и дијагноза во судницата
Во текот на главната расправа, обвинетиот:
Ги признал кривичните дела („Насилство“ и „Спречување службено лице во вршење службено дејствие“).
Им се извинил на оштетените новинари во судницата.
Изразил искрено каење.
Судот ја зел предвид неговата здравствена состојба како олеснителна околност. Вешто лице-психијатар утврдило дека Спасов боледува од хронично „Шизотипно растројство“.
Оваа состојба, според вештачењето, резултира со намалена способност за контрола на импулсивноста и бара секојдневна терапија, поради што Судот оценил дека лекувањето е приоритет за корекција на неговото однесување.
Судот: Нападот врз новинари е напад врз демократијата
Иако е изречена условна осуда, Судот во образложението испрати силна порака за заштита на медиумските работници.
