„Пред три дена ни рекоа дека се е под контрола, а денеска се поплавивме, големи штети има и ова се повторува секоја година“, вели земјоделецот Максимов
Утрово се излеа Кочанската река, која предизвика поплавување на куќи, ниви и магацини со ориз. Едно од семејствата не можело да ја напушти својата куќа и останало заглавено на терасата.
„Сабајле околу 6 часот видовме дека водата надојде. Не можеме да излеземе, само до терасата и таму застанавме“, изјави сопственичката на една од поплавените куќи.
Таа нагласи дека очекуваат итна интервенција од градоначалникот за да се разговара за состојбата и потенцијалната штета.
Тони Максимов, координатор за ориз во Националната мрежа на земјоделци, истакна дека штетите се огромни.
„Моментално се поплавени многу куќи, тоа се околу десетина куќи. Да не зборуваме за површините кои се посеани – трпиме големи штети. Водата се уште не се повлекува, дури и надојдува. Ова е резултат на несоодветно одржување на каналите, кои требаше да бидат исчистени. Пред три дена добивме информација од директорот дека ситуацијата е под контрола, но очигледно ништо не е под контрола и ќе бараме одговорност.“
Максимов додаде дека ваквите поплави се повторуваат скоро секоја година при пообилни врнежи, предизвикувајќи сериозни штети за земјоделците и за жителите на Облешево.
