ИЗГЛЕДА НАВИСТИНА СЕ СУДЕЛО ВО ШТАБОТ НА СДСМ НАМЕСТО ВО СУД Јанкуловска остро ѝ возврати на опозициската партија
Според реакцијата на СДСМ, изгледа сепак таму се судел предметот, а не во Кривичниот суд, остро возврати поранешната министерка за внатрешни работи Гордана Јанкуловска на соопштението на опозициската СДСМ, во кое партијата го релативизира фактот што Европскиот суд за човекви права отвори постапка за тоа дали ексминистерката имала правично судење. За предметот „Тенк“, за набавка на мерцедес за Владата, судијката Добила Кацарска на Јанкуловска ѝ пресуди 6 години затвор, што Јанкуловска ги одлежа во Идризово.
СДСМ не треба да се чувствува засегнат од нејзината апликација до Европскиот суд за човекови права.
„Зошто СДСМ би се нашле засегнати и повикани за коментар за апликација пред ЕСЧП, во која се бара да се утврди повреда на Правото на правично судење која ја сторила некоја ‘независна’ судијка во некој предмет што се водел пред Кривичниот суд, небаре предметот се судел кај нив во штаб? Ама според реакцијава, изгледа сепак таму се судел“, напиша Јанкулоска.
Претходно Јанкуловска изјави дека почитувањето на процесните правила, доказите и материјалното право во предметот против неа „беа на значително пониско ниво од она што го имале Нирнбершките процеси во времето во кое се случувале, па дури и на пониско ниво од судењата за време на Информбирото во однос на остварување на процесните права.
На оваа критика за судството се јави СДСМ кој соопшти дека изјавите на Јанкуловска „се единствено и само потсвесни, од аспект на тоа што тие процеси биле насочени против нацистите и злосторниците од тогашната нацистичка Германија“.
„Ситуацијата со апликацијата на Јанкуловска пред Европскиот суд за човекови права е правен механизам што секој граѓанин има право да го искористи. Станува збор за формално дозволување на една апликација – чекор кој претставува само утврдување дека се исполнети процесните услови за Судот евентуално да пристапи кон суштинска анализа. Ништо повеќе. Како партија, сметаме дека во оваа фаза не е ниту потребно, ниту етички, ниту правно основано да се коментира материјалната суштина на предметот. „Апликантката“ која денес зборува за човекови права беше токму таа која ги газеше“, соопшти СДСМ.
.
