Познат редоследот на гласачкото ливче во четири општини
Државната изборна комисија (ДИК) на денешната седница го утврди редоследот на гласачкото ливче за повторените локални избори во општините Гостивар, Врапчиште, Центар Жупа и Маврово Ростуше, кои ќе се одржат на 11 јануари.
Со јавна ждрепка беше одредено ВРЕДИ да биде под реден број 1, коалицијата „Твоја Македонија“ предводена од ВМРО-ДПМНЕ под број 2, НАИ под број 3, коалицијата предводена од СДСМ под број 4, група избирачи со носител Зулхајрат Демири под број 5 и Демократската партија на Турците во Македонија под број 6.
Претседателот на ДИК, Борис Кондарко, информираше дека општинските изборни комисии претходно ги потврдиле кандидатските листи, а Комисијата ќе ги објави и описите на избирачките места на официјалната веб-страница, со цел навремено информирање на граѓаните.
На седницата беше усвоен и планот за едукација на избирачките одбори за повторените избори, како и одлуки поврзани со изборното рекламирање и исплата на надоместоци за ангажирани лица со знаковен јазик.
Од ДИК посочија дека сите подготовки за организација на повторените избори се одвиваат согласно роковите и законските обврски.
