ПОЖАРОТ ВО ТРУБАРЕВО ЦЕЛОСНО ИЗГАСНАТ: Три лаборатории и Армијата ја проверуваат токсичноста, Меџити го поврза со Вардариште и Дрисла
По повеќе од 15 часа интензивна борба, пожарот во објектот за рециклирање на батерии и електронски отпад во Трубарево е целосно изгаснат и локализиран, соопшти денеска министерот за животна средина, Изет Меџити. Тој нагласи дека сега започнува сеопфатна истрага за утврдување на еколошката штета, во која се вклучени три независни лаборатории и специјализирана единица на Армијата.
На прес-конференција, Меџити информираше дека во мерењето на квалитетот на воздухот биле ангажирани акредитираната лабораторија „Еуромак Контрол“, лабораторијата при самото Министерство, како и посебната Единица на АРМ за атомска, биолошка и хемиска одбрана. Дополнително, во наредните пет дена, мерења ќе врши и лабораторијата „Амбикон“ при Универзитетот „Гоце Делчев“ во Штип.
„Државниот инспекторат за животна средина денес започна и административен инспекциски надзор кај правниот субјект ‘Ф-Групација’, од кој ќе бидат земени сите потребни документи“, изјави Меџити, додавајќи дека компанијата поседувала важечка дозвола за работа издадена во 2021 година.
Министерот најави дека по завршувањето на инспекцијата ќе се земаат мостри од почвата и ќе се нарача вештачење за прецизно да се утврди степенот на загадување на животната средина.
Тој го стави инцидентот во поширок контекст, поврзувајќи го со неодамнешните еколошки проблеми со депониите Вардариште и Дрисла.
„Ова е аларм кој бара сериозна институционална мобилизација, која веќе е во тек. Очекуваме инцидентот да се расветли и причините, односно причинителите, да бидат јавно обзнаени“, порача Меџити.
Министерот упати огромна благодарност до сите институции и пожарникари кои учествуваа во гаснењето, како и до жителите на Трубарево за нивната смиреност и солидарност.
