Пожарникарот Благој Паунов сведочеше како се одвивала спасувачката акција во „Пулс“: На паркингот имаше многу луѓе, некои паднати, а други заглавени на скалите и пред влезната врата
На денешното рочиште за пожарот во дискотеката „Пулс“ пред судот сведочеше пожарникарот Благој Паунов, кој детално опиша како се одвивала спасувачката акција во трагичната ноќ.
Паунов изјави дека дојавата за пожарот ја примил во 2:35 часот, а огнот бил изгаснат околу 4 часот. Заедно со колега пристигнале како прво противпожарно возило само пет минути по дојавата.
– Нашата стандардна процедура е најголем приоритет спасување човечки животи. Mоравме да ги извадиме лицата. И кога дојде и вториот тим и тие извлекуваа прво, зошто не можеа да пуштат линија. Веднаш пристапивме кон извлекување на лицата заглавени на влезната врата. Кога извадивме едно лице моравме да побараме помош од полицијата и двете лица од обезбедувањето и цивилни лица. И така во мешовити тимови почнавме да ги извлекуваме децата. Послабите полесно, а покрупните потешко и секој различно реагираше. Некои беа избезумени, во шок и грч и моравме да ги носиме до паркинг. Други, пак од паника газеа врз нас и други деца за да излезат. Кога го поднамаливме бројот, во тој момент веќе приметив дека пристигна брзата помош како и повеќе цивили и дека почнале да ги носат до болница, изјави сведокот.
Тој нагласи дека приоритетот на пожарникарите е спасување на човечки животи.
-Излегов и побарав помош. Откако ги извлековме сите имаше друга врата, помала во која имаше многу деца заглавени. Кога излеговме веќе приметив дека се пристигнати сите мои колеги и пуштени сите линии и почнато со гасење, изјави сведокот.
Паунов раскажа дека влегол и во билетарата каде затекнал над десет лица без знаци на живот и побарал помош за нив. Потоа пристапил кон извлекување на заглавените лица од помала врата, како и од тоалетите, каде исто така имало луѓе кои не можеле сами да излезат.
„Кога се стабилизира ситуацијата и се пристигнати сите мои колеги, беа пуштени сите линии и започнато гасење“, додаде тој, потенцирајќи ја сложеноста и драматизмот на спасувачката операција.
