Пожар избувна по пукање на нафтовод во Украина: Меѓу жртвите има и деца
Голем пожар избувна по пукнување на нафтовод во областа Ивано-Франковск во западна Украина. Имаше жртви, пренесе Франс прес, повикувајќи се на украинската национална служба за вонредни состојби.
Според службата цитирана од УНИАН, повредени се 9 лица, меѓу кои и две деца кои се во критична состојба. Тројца возрасни исто така се тешко повредени.
Нафтата се излеа на површина од околу 100 метри квадратни.Спасувачите се испратени на местото на настанот, додаваат од службата.
Силен пожар избувнал на местото на трагедијата, според локалните медиуми таму имало силна експлозија. На сликите објавени на социјалните мрежи се гледаат густи облаци од црн чад над населба.
Местото на пожарот е на стотици километри од линијата на фронтот на борбите со руските сили во источниот дел на земјата, забележува Франс прес.
