ПОВЕЌЕ ОД 200 МИЛИЈАРДИ ДОЛАРИ ВО ЗЛАТО: Оваа земја има со што да се пофали
Вредноста на златните резерви на Русија во октомври за прв пат надмина 200 милијарди долари, покажуваат денеска објавените податоци од Банката на Русија.
На крајот на октомври Русија имаше златни резерви во вредност од рекордни 207,7 милијарди долари, а руските инвестиции во злато минатиот месец се зголемија за речиси четири отсто, пренесува РИА Новости.
Учеството на златото во вкупните руски меѓународни резерви во октомври порасна на 32,9 отсто, што претставува рекорден удел од ноември 1999 година, кога изнесуваше 34 отсто.
Максималното учество на златото во руските резерви беше забележано на 1 јануари 1993 година и беше на ниво од 56,9 отсто, а минималното учество во јуни 2007 година – само 2,1 отсто.
Банката објави и дека вкупната вредност на руските меѓународни резерви, вклучувајќи злато и девизи, на 1 ноември изнесува 631,6 милијарди долари.
