Пораз што не боли: Младинците со сребро го потврдија пласманот во дивизија А!

16/07/2023

Македонските кошаркарски надежи храбро се бореа против Чешка во финалето на Европското првенство (ЕП) во Скопје, но загубија со 72-85. Ова беше втор неуспех на нашите кошаркари против истиот ривал на првенството, меѓутоа денешниот пораз паѓа во сенка на пласманот на Македонија во А-дивизијата.

Младинците имаа катастрофален почеток на натпреварот, па лошата одбрана беше казнета со водство од +10 (14-4) на Чешка. Сепак, македонските кошаркари се соземаа во продолжение и конечно проработе нападот за да намалат на само еден поен негатива (13-14).

Чешка повторно ја презема контролата врз натпреварот во втората четвртина и создаде двоцифрена предност (33-21), а нашите надежи до полувреме намалија на 26-35.

Македонија блесна во третата четвртина, кога влезе во неверојатен ритам и ја стопи негативата, а успеа и да направи пресврт за момент (48-46), по што во последните 10 минути од дуелот двете екипи влегоа со нерешен резултат (52-52).

Одбраната на македонскиот состав во последната четвртина беше очајна, а тоа знаеше како да го искористи Чешка и на крајот да триумфира со убедливи 85-72.

Најефикасен во македонската репрезентација беше Симиќ со 23 поени, додека Петков постигна 14 поени.